Parentis olim siquis inpia manu

          senile guttur fregerit,

edit cicutis¹ alium nocentius.

          o dura messorum ilia.

quid hoc veneni saevit in praecordiis?

          num viperinus his cruor

incoctus herbis me fefellit? an malas

          Canidia tractavit dapes?

ut Argonautas praeter omnis candidum

          Medea mirata est ducem,

ignota tauris inligaturum iuga

          perunxit hoc Iasonem,

hoc delibutis ulta donis paelicem

          serpente fugit alite.

nec tantus umquam siderum insedit vapor

          siticulosae Apuliae

nec munus umeris efficacis Herculis

          inarsit aestuosius.

at siquid umquam tale concupiveris,

          iocose Maecenas, precor,

manum puella savio opponat tuo

          extrema et in sponda cubet.