|
Ex tempestatibus aquilo
tussim movet, fauces
exasperat, ventrem adstringit,
urinam supprimit, horrores
excitat, item dolores lateris et pectoris.
Sanum tamen corpus spissat
et mobilius atque expeditius reddit. Auster
aures hebetat, sensum tardat,
capitis dolores movet, alvum
solvit, totum corpus efficit hebes,
umidum, languidum. Denique
omnis calor iecur et lienem inflat,
mentem hebetat; frigus modo nervorum
distentionem, modo rigorem infert; illud
spasmos, hoc tetanos Graece nominatur; nigritiem in ulceribus,
horrores in febribus excitat. Celsus (De Medicina II, 1,
8-12)
|
